Шааире дюзида увгьо: «Гьин дюнйе са нахварий вобна, гьаарна арына иляккы чихъа айкIанна». Амма сасса манчихъа геер илякка, сасса кIыл’ра. Сассанкъве хизаныс, хивыс, миллетыс хайир гьуво до гьадсыр айкIан, саса 90-100 сен гьаъу гьидчуд гьдяссыр айкIан.

Нена няхуIр гьини дюнйейле аркIыний садджу Аллагьыке аIслыда водун.
ОIтмишхьайни уIл’джуме Муслагъни хивна, цIаIхни миллетна игит Мамедов Кьасым МагьаIммадна дих джаванраджар раIгьматехъа аркIын. Манкъун гьайни сен 50 сен быкырхьа.
Кьасым Мамедов 30 сенний водун Астарханни шагьарее хизаныква ешемишехьен. Маъаб манкъве ишкарыйвалла (бизнес) гьааъа вухьа.
Мана Астарханни вилаетыл’ Дагъыстанни миллетбышин миз, маданият гьуваджени АООР «Дагъыстан» донани джамиятна йишди миллетна эл’чий ыхьа.
Зы Кьасым Мамедовыка 2023-ъэсди сенни сентябрьни вуза Астарханхъа форумейхъа гьаркIынийнкъаI танышхьа. Мани вахтал’ Астархан ешемишоохьени цIаIбыше Украине СВО вурушмышоохьени йишди эскераршис гуманитарын кумаг саъа ыхьа. Мани ишбышихъа маа иляккана Кьасым Мамедов ва «Шукур» донани компание ишлемишоохьен йишин инсанар вухьа. Манбышилхъа зынар къошылмышхьа ман гуманитарын кумаг ши Луганскни, Запорожьейни ва Херсонни вилаятбышил’йишди эскераршилхъа гьихьараъуйн. Манчиле хъийгъа мана Дагъыстанейхъа арайленкъаI йишди редакциейна мигьман ыхьа. ГьамаIхуIб йишда доствалла итIумоохьи вухьа. Са АлагьыкIле ацIа ыхьа мани доствалихъаб кIыл’на мугьлат вухьай.
Астарханни шагьаре «Нур» кIазет одкIун ва йидж джаа еймишаъас, маани йишди халкьни хурни ушахаршис ед’на миз гьуваджес шарааитбы яратмышаъас Кь. Мамедове хил’дже заIгьматбы гьаъу. Манчиле гъайре, мааъад цIаIхни мизен - онлайн дарсбы ыккейс ва манчис лазымын ед’ни мизелин китаббы алищес, «Шукур» компаниейква саджиге манкъве хаIбна иш къавдже.
Увгьойбышихъа гора, Кьасым МагьаIммадна дих аIхрейни вахтал’ мед йишди эскераршис гуманитарын кумаг саъа ыхьа. Манкъуна макьсад ман кумаг гьайни делесийвал’быше йишди эскераршилхъа гьихьараъуй вухьа. Амма ман манкъус кьисматда ыхьа деш.
АООР «Дагъыстан» донани джаIмиятни хаIрынкъуни Юсуп МагьаIммадовни увгьойква, Кьасым Мамедов садджу Астархан ешемишоохьени цIаIхбышди аIрайл’ джар деш, гыргыни шагьаре ешемишоохьени дагъыстанлыбышди аIрее хаIбни гьуIрматыква ыхьа. Манкве къеджени гыргыни ишбышее хаIдын иштырак гьаъа ыхьа. Шас мана шосхьинне геер хъийкын. Гьиджоне гьаъас? Мана Аллагьна иш вобна. Ши манкъуни хизаныс, делесынбышис ва быкырни хивни джамаIъатыс башсагълыгъийвалла гьооли, джос йикIес сабырбы гьеленбыва эйгьи.
Кьасым МагьаIммадов Муслагъни хивее, джамаIъатни аIрее къеджени ишбышисыд джуке аIхан кумаг гьели ыхьа.
Шаваа эйгьийи ватанылхъа аилейква даватбышейхъа ейлягъыс ары, уфтанда иштыракбыд джаа гьаъу, джан гьелива. Шавааджад деш. Манкъус махуIд Аллагьыке кьисматда ыхьа.

Ши йишди редакциейни сураке манкъуни аилейс, делесынбышис, Муслагъни хивни джамаIъатыс башсагълыгъийвалла гьооли ва йикIес сабырбы гьеленбыва эйгьи. Аамин!