Дагъыстан республикайс сабара гагьна хаIбвалла гьааъани Фёдор Щукине Дагъыстанын геледжагъ ва ешайиш-экономикайна вазият юг хъааъасдиме «Дагъыстанна команда» тезе программа ишилхъа абчы. Манчина макьсад, республикайхъад водун мисалабы дурустни йаIххъылхъа адчесдимее къуллухбышилхъа кар ацIан саIнаъаткарар алябтIуй вобна.

Проектыс назарат Фёдор Щукине гьаъас. Къийна мааъад иштыракаъас гыргынкъухъад барабарын гьукьукьбы водунбы. Гойнед гьийгъанче гьихъа къуллух алябтIасдимее, нейид аливщесдимее маIгьдын имканбы ихьес деш. Мани сардан сайтейхъа хъадыйн анкетабы республикайни хаIрынкъукIле къаджесынбы. 
Манчика багълыда гаф гьааъанкъаI сабара гагьна республикайни башчийе увгьойн: «Йиздиме гьокуIматни ва муниципални къуллухбышил' кар ацIан инсанар ишлемишувхьай вааджибда водун. Няъас увгьое, садджу баджарухукани ва аIкIеликва иш вуккеккани саIнаъаткарарше республикайс хайир гьелес. Къийна хаIдданани къуллухбышил' танышийваликва ишилхъа алятIуйнбы инсанар ишлемишоохьи. Ши чалышмишувхьесынбы мани сардан республикее яранмишувхьана вазият югни суралхъа бадалааъас».
Мани проектыхъа хаIбна гудж вухьай сабара гагьыле ваацIавхьес. Къуллухбышил' ацIаал'нан саIнаъаткарар ишлемишоохьи гибгъылмее, хаIдда югни суралхъани бадалхьайбышиква ши растына хъавалес. Манбы инсанаршини ешайишиква, манбышди доланаджагъыква, республикайни экономикайка ва гьихъа адкIынийква багълыдананбы ихьес.
АIхрейни сабара сенбышее Дагъыстанее мани сардан яранмишувхьана вазият шавусджаб кьабылёхьи дешдий. ХаIдданани вахтал' ахтыни къуллухбышил' варрыбишин ушахар воохье. Манбышди деккярше гьийгъанче-гьихъа манбышисда джига къооджи вухьа. Далы дешди инсаныс югна иш авайкый дагъамна мисаланый. Мани карее гьаммаше дагъамийвалла хурни миллетбышди эл'чершений цIыцIааъана.
ОIгийл йишин ватанэгьлер джурабаджурайл'ни къуллухбышил' растына хъавайленбыний. Мисалайс хаIдда сенбына ЧIародайни МЖС хаIбвалла гьавъуна Мамед ГьыIсейнов, Рутул районни исполкIомна хааIрна Рамазан Кьоджаев, Хивни тасарруфатна министр ШаIъбан Мамедов, Халкьнни Маджлисын депутатар АIриф Омаров, ХаIнмагьаIммад РаIгьимов, Фикрет Раджабов, ГьокуIматни Советна эл'чий Рамазан Мамедов, Конституционни судна судье Сабир Маллеев ва сабара мебынбы алябтIас воохьи. Манбышди гьаарункъве джуни джигайл' республикайн экономика артмишаъасдимее хаIбна иш вукку.
ГьаIшдийна вазият мебна вобна. Къийна цIаIхни миллетын эл'чеер къуллухбышил' тека сейракба растына хъавайли. Няъасне маIгьад эйхьи? МаIгьдын суал садджу зыджад деш, хаIббананбыше гьели. Манчина сабаб джаванар гьихъа цIыцIааъасдимее къырагъале кумаг гьелена дехьай вобна.
Гьел'бетде, мани карее саймазыйвалла республикайни гьихъани вукIлелинбышеб къавуккуна. Манбышис Дагъыстанее ешемишехьени хурун миллетбы кIелидхынийнбы. Агар маIгьад дехьайнихьий, къийна шахъаб Халкьни Маджлисе депутатный ихьес, Рутул районни администрациейл' ишлемишоохьен цIаIхни элен эл'черний вухьес
Дагъыстаныс сабара гагьна хаIбвалла гьааъани Фёдор Щукинни джуваббышихъа гора, тезе ишилхъа адчыйни проектын гыргынбышди аIрайл' барабарийвалла яратмишааъас. Къуллухбышилхъа югун билигнан, республикайхъад водун мисалабы гьаIллаъас аIхан инсанар хъавалес.
Йищин миллет сайис кIылин халкь ыхьейид, шахъаб хаIбба баджарухукван, гьаIкIен саIнаъаткарар вобунбы. Манбышди аIрайл' чIаIрани дипломбышыква аали мактаббы быкырауйнбыб вобунбы. Манбышда геллесда къийна иш дена аху ворна. Умудааъана, манбышди хаIббананбыше «Дагъыстанна команда» проекте иштыракаъас. ШакIле манбы геледжагъыл' югни къуллухбышил' къавджуй вуккан.

Шавусый мани программе иштыракаъас ыккан Командадагестан РФ сайтейхъа иккебчIе ва манчини усулбышиква танышебхье.