Рутул район Дагъыстаней марказыс аIкьанан ва табиятыс дагъамын район водун. Мааъад гьар вахтал’ ишыгъена, хьинена, йаIхъбышда, телефонни связьна дагъамийвалла воохьена.

ОIтмишхьайни йигъбышее сувабышил’ гуджнан гёгъыйбы ыхьа. Манчин дамабы дашмишаъу, селер гьаъу. Мана фаляакат быкырни Рутулни районе са уIл’джумна ишыгъбы ва телефонын связь дехайна сабаб вухьа. Самур дамайни хьинен Гыл’мецIни ва Лекни хивеехъана йаIхь итIумавъу ва махъа не инсан, нейид машин ийкарасда мумкум вухьа деш.
Районе ишыгъ дехьайна сабаб Ахтани районни Зрыхни хивыни кIане ахтынавольтнана анкер къаайибхьый вухьа. Мана анкер Дагъэнергойни ишчершди кумагыква тезелемишавъу. Манчиле хъийгъа районехъа ишыгъ хъады. Амма, сабара маIълуматыхъа гора, Рутулни хивни кIане Самурни даман хьян хаIдхъихьее къаавхьасда анкер сайиб вобна. Мана къаайибхьее меед районе са уIл’джымна ишыгъбы ихьес деш. Умудааъана, ишыгъ идарайн манчилхъа фыкыр гьевлесда.
Сувал’ни дерайл’ телефонун связь дехьайна сабаб маа Билайнын техника харабхьай вухьа. Махъа мани компаниейн ишчер абы. Манбыше маадын аппаратура хъаъасва гардана алятIу вод.
Гёгъыйбыше хаIбна дагъамийвалла Гыл’мецIни ва Лекни хиваршис гьуво. Даман хьян хаIдхъыхьа, мани хиваршейхъана йаIхъ гьобгъул абкIынна. Самур дамайлени йыIгъысаненче Гыл’мецIни хивейхъа аIлхъаани джигейхъамеена йаIхъ хьинен гьобгъул абкIын вобна. Хивни джамаIъатын къаебы гиххьы илгъебчIесда йаIхъ алявъу. Амма машин илгъечIесда мумкум дешда. Манчихъа гора манбыше гыргын карбы (материал, одхьуний) хылека машинелхъамее гьаххъа водун.
Мана дагъамийвалла мани хиваршее гьар гёгъый ыхьамее воохьена.Анджах гьайни зарбас вазият гееб дагъамба вобна. Инсанаршди увгьойхъа гора, не районенче нейид республикенче махъа саджар инсан ары деш, джос ненчеджад кумаг дешин. Манчини аллад, джаIмаъатын районни ва республикайни чIакIынбышилхъа хивейхъана йаIхъ медни джигейнче гьааъас вукканва мураджият гьаъас.
15-20 сенна гьихъа зас йикIелёдун Гыл’мецIни хивейхъана йаIхъ хивни авгъанче Лекагъан дамайни сурале гьааъасва назарей алятIу ыхьа. Амма ман проект кагъызел’ од аху. Манчис башара гьааъана ыхьа деш.
Сайид гьаман эгьес ыккан, хивни дагъамийваллабышди гьаIкIее садджу джаIмаъат ва йишин кIазет деш балеэ ахвас ыккан, манчини гьаIкIее хивни хаIрынкъве, районни администрациейн ва районни йаIхъбышихъа иляккани ташкилатын республикайни хаIбынбышилхъа гьихьараъас ыккан.
Синоптикаршди увгьойка, дёлесни вахтал’ сувабышее гегъыйбы меед ихьес. Манчихъа гора, йаIхъбышил’ аIгьтият гьааъас вукканва манбыше тапширмишаъы.
Ши, кIазетни ишчерше, гьар вахтал’ йишди хиваршее эхьени дагъамийвал’бышди гьаIкIее (ишыгъ, йаIхъ, связь) дешданкъаI садджу кIазетеджад деш, соцсетьбышейид одкIун, районни ва республикайни чIакIынбышилхъа маIълумат гьихьараъан. Ман йишин бордж водун.

Амма йишди инсанарше лазымни вахтал’ поштейхъа гьабкIын кIазет ойкIан деш. Манбыше эйгьен: «Зы гьиджооне манчика гьаъа?». КIазет гыргынчиле гъайре вушди кумагыс хъадайли, республикайни чIакIынбышилхъа вушин дагъамийваллабы гьихьараъасын тадбырбы къеджи. Мана иш йишдимее мебынбыше гьааъас деш.