Сувалин джамаъаlт имааджеехъа хъигъечlу

19 Март 2017
Author :  
Юххьан хъадыйнкъаl гыргынанкъаl имааджийбы гьаъан аlдат водун. Мартни вузани цlеддыйни уlл’джумее шагьарбышее, районбышее инсанар темизийвалла гьааъас кучебышейхъа хъигъеебачlи. Маlгьдын югун аlдат Сувал’ни маlгьалыл’ни хиваршейид водун.
Гьайни йигъбышее Мишлешни, Гыл'мецlни, Цlаlхни хиваршее хаlдын имааджийбы илгъечlу. Гьини элеес добы алядхъыйни хиваршин инсанар горханабышил’ ишлемишувхьа. 
Гыл'мецlни хивни джамаъаlтын цlедда манзикын гьихъый алладын джигабы гьаlшике темизяу, гойнеб манбы хивни някьвбышил' ишлемишувхьа. Мыкlаал'бышихъа ил'дяакы, манбыше назарее аххъыйн ишбы гьаъас аlхыйнбы. Хивна имам Аlсадуллагь Рамазановни увгьойка, мани йигъыл' имааджейхъа джо республикайни муфтиятни тапшырыгъыква хъигъебчlу.  Гьаlдисее одкlун водун «Темизийвалла инамын сура водун».
Цlаlхни хивни джамаъаlтыныд хивни манзикын ёкь сура абрелхъа хъаляу. Мани йигъыл' энки хаlдын имааджий Мишлешни хивее илгъечlу. Хивни администрациейна хааlрна Рамазан Къубалыеве мани каралхъа хаlбна фыкыр гьооли. Манкъве гьаар сен юххьан хъадыйнкъаl, хивни аlраlйл' хаlдын имааджий гьаъа. Махъа хивна хааlрна-кlыл'на хъигъечlи. Джамаъаlтын хивын йаlхъ-кьыlтlбы гьаlшике темизяъа, гьигъадкырийн джигабы абрыхъа хъаляъа.
Гьайни сеныд ман аlдат бадалау деш. Мишлешин джамаъаlт хаlдни имааджеехъа хъигъечlу. Гьини элеес манбыше хивын горхана абрылхъа хъаляу. Едарше някьвбышилин гьаlшбы, окlбы темизяу, хаlдни зияратын ёкь суралин къае-къамче дыlргъеехъа сау. Адамершед горханайни гьихъый аллан диракбы тезелемишау, сетlкlа цlыцlау.
Республикайни муфтиятни ишчерше  имааджеехъа хъигъебчlуйни инсанаршиле разийба авху. Манбы геледжагъылид маlгьдын имааджийбы экlда-экlда алгъагьас мыслягьаlтейхъа хъабы.
 

 

156 Views
Super User
Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree